ՀՀ ԿԵՆՏՐՈՆԱԿԱՆ ԲԱՆԿԸ ՀԱՇՈՒԱՐԿԵԼ Է 2007 Թ.-Ի ՉՈՐՐՈՐԴ
ԵՌԱՄՍՅԱԿԻ ԲԱՂԱԴՐԵԱԼ ՏՆՏԵՍԱԿԱՆ ԻՆԴԵՔՍՆԵՐԸ
25-12-2007 20:00:00 | Հայաստան | Տնտեսութիւն
ԵՐԵՎԱՆ, 25 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: ՀՀ Կենտրոնական բանկը
հաշուարկել է 2007թ.-ի չորրորդ եռամսյակի բաղադրեալ տնտեսական
ինդեքսները նախորդ եռամսյակի եւ նախորդ տարուայ չորրորդ եռամսյակի
նկատմամբ: Ինչպէս «ՆՈՅԵԱՆ ՏԱՊԱՆ»-ն յայտնեցին ՀՀ ԿԲ-ի մամուլի
ծառայութիւնից, այս տարուայ երրորդ եռամսյակի նկատմամբ չորրորդում
գործարար միջավայրի ինդեքսը կազմել է 92,1%, իսկ 2006թ.-ի չորրորդ
եռամսյակի նկատմամբ` 98,1%, տնտեսական ակտիւութեան ինդեքսի
պարագայում այդ ցուցանիշները կազմել են, համապատասխանաբար, 78,6%
եւ 84,3%, իսկ սպառողների վստահութեան ինդեքսի պարագայում,
համապատասխանաբար, 92,6% եւ 96,5%:
2007.թ-ի չորրորդ եռմասյակի բաղադրեալ տնտեսական ինդեքսների
հաշուարկման համար ընտրանքային սկզբունքով հետազօտուել են
արդիւնաբերութեան, շինարարութեան եւ ծառայութիւնների ոլորտների
844 կազմակերպութիւններ: Հարցման են ենթարկուել նաեւ 2961 տնային
տնտեսութիւններ Երեւան քաղաքում եւ ՀՀ բոլոր մարզերում:
Հարցումներն իրականացուել են ինտերնետի, հեռախօսակապի, նամակների եւ
ֆաքսիմիլային կապի միջոցով: Գործարար միջավայրի ինդեքսը հաշուարկուել
է ռիսկերի եւ ընդհանուր տնտեսական վիճակի փոփոխութիւնների
վերաբերեալ կազմակերպութիւնների գնահատականների միջինացումով,
տնտեսական ակտիւութեան ինդեքսը` թողարկման ծաւալների, արտադրանքի
կամ ծառայութիւնների նկատմամբ պահանջարկի եւ պաշարների վերաբերեալ
կազմակերպութիւնների սպասումների գնահատականների միջինացումով:
Սպառողների վստահութեան ինդեքսը հաշուարկուել է տնային տնտեսութեան
եկամուտների, կենցաղային ծախսերի եւ զբաղվածության
փոփոխութիւնների, ինչպէս նաեւ ներկայ տնտեսական պայմանների
գնահատականների միջինացումով:
Հարցերը կրում են որակական բնոյթ` պատասխանների «աճել է»,
«մնացել է անփոփոխ», «նուազել է» տարբերակներով: Պատասխանների հիման
վրայ հաշուարկւում է իւրաքանչիւր տարբերակի տեսակարար կշիռը
պատասխանների ընդհանուր քանակում, այնուհետեւ դրական պատասխանների
տեսակակար կշռին գումարւում է չէզոք պատասխանների կշռի կէսը`
ստանալով պատասխանների հաշուեկշիռները: Վերջիններիս արժէքները
տատանւում են 0-100 միջակայքում: Ընդ որում, 50-ից բարձր արժէքը
ցոյց է տալիս դիտարկուող երեւոյթի դրական միտում, 50-ից ցածր
արժէքը` բացասական միտում, 50-ը նշանակում է անփոփոխ իրավիճակ: