ԵՐԵՎԱՆ, 16 ԱՊՐԻԼԻ, ՆՈՅՅԱՆ ՏԱՊԱՆ: Հայ-թուրքական սահմանի բացման դիմաց Հայաստանը Թուրքիային պետք է առաջարկի դառնալ ԵԱՀԿ-ի Մինսկի խմբի համանախագահող երկիր: Այսպիսի հայտարարություն արեց Գլոբալիզացիայի եւ տարածաշրջանային համագործակցության վերլուծական կենտրոնի տնօրեն, քաղաքագետ Ստեփան Գրիգորյանը ապրիլի 16-ի ասուլիսում: Նրա խոսքերով, դա հայկական կողմին ձեռնտու է, քանի որ Թուրքիայի համանախագահող դառնալու արդյունքում Ադրբեջանի դիրքերը տարածաշրջանում կթուլանան: Այն հարցին, թե ի՞նչ պետք է անի Թուրքիան Մինսկի խմբի կազմում, Ս.Գրիգորյանը պատասխանեց. «Թուրքիան կարող է Ադրբեջանին համոզել, որ հակամարտությունները առանց փոխզիջումների չեն լուծվում»: Ս.Գրիգորյանը միաժամանակ հայտարարեց, որ անհրաժեշտ է տարանջատել հայ-թուրքական հարաբերությունները եւ ղարաբաղյան հիմնախնդիրը: Պատասխանելով այն հարցին, թե ինչպե՞ս պետք է Հայաստանը սահմանի բացումից հետո դիմագրավի թուրքական տնտեսական, մշակութային եւ քաղաքական հնարավոր էքսպանսիային, Ս.Գրիգորյանը նշեց, որ չպետք է թերագանահատել հայ ձեռներեցների տաղանդն ու գործարար հմտությունները: «Ես համոզված եմ, որ սահմանի բացումից 5 տարի հետո Թուրքիայի կառավարությունը կընդունի օրենք, որով կձգտի Կարսի շուկան զերծ պահել հայ առեւտրականների ներխուժումից»,- ասաց Ս.Գրիգորյանը:

---