Բունդեսթագի պատվիրակությունը հյուրընկալվել է ԱԺ եվրոպական ինտեգրման հարցերի մշտական հանձնաժողովում
15-09-2026 17:23 Հայաստան Մամլո հաղորդագրություն
Ազգային ժողովի եվրոպական ինտեգրման հարցերի մշտական հանձնաժողովի նախագահ Հարություն Հարությունյանը, հանձնաժողովի փոխնախագահ Սոնա Ղազարյանը, հանձնաժողովի անդամներ Տաթևիկ Գասպարյանը, Արեգա Հովսեփյանը, Սուրեն Հովհաննիսյանը և Լևոն Քոչարյանը սեպտեմբերի 15-ին հանդիպել են Գերմանիայի Դաշնային Հանրապետության Բունդեսթագի Եվրոպական միության հարցերի հանձնաժողովի նախագահ Անտոն Հոֆրայթերի գլխավորած պատվիրակության հետ։
Ողջունելով հյուրերին՝ Հարություն Հարությունյանն արժևորել է Հայաստան-Գերմանիա դինամիկ զարգացող հարաբերությունները։
Խոսելով ՀՀ-Եվրամիություն ընդլայնվող համագործակցությունից՝ հանձնաժողովի նախագահը կարևորել է եվրոպական չափանիշներին համապատասխան թե՛ պետական ապարատ, թե՛ անկախ դատական համակարգ և թե՛ դիվերսիֆիկացված տնտեսություն ունենալու հնարավորությունը։
Ազգային ժողովի պատգամավորները խոսել են Գերմանիայի հետ տարբեր ոլորտներում, մասնավորապես՝ տնտեսական, կրթության, առողջապահության բնագավառներում համագործակցության խորացման և փորձի փոխանակման անհրաժեշտության մասին։
Հանդիպմանն անդրադարձ է եղել ԵՄ վիզաների ազատականացման գործընթացին։ Այդ հարցում առաջընթացի ապահովման համար ընդգծվել է Գերմանիայի դերակատարությունն ու աջակցությունը։
Հյուրերը խոսել են երկկողմ գործակցությունից, կարևորել Հայաստանի և Ադրբեջանի միջև խաղաղության հաստատումը։
ՀԱՅԵՐԵՆ
