ՆԱԽԱՏԵՍՎՈՒՄ Է ՀԱՅԱՍՏԱՆՈՒՄ ՁԵՎԱՎՈՐԵԼ
ՔԻՄԻԱ-ՀԱՆՔԱՐԴՅՈՒՆԱԲԵՐԱԿԱՆ ԿԼԱՍՏԵՐ
23-01-2008 22:00:00 | Հայաստան | Տնտեսություն
ԵՐԵՎԱՆ, 23 ՀՈՒՆՎԱՐԻ, ՆՈՅՅԱՆ ՏԱՊԱՆ: Հանքարդյունաբերության
զարգացումը Հայաստանում ստեղծում է նաեւ քիմիայի եւ
մեքենաշինության ճյուղեր ներդրումների ներգրավման հնարավորություն:
Այս մասին հունվարի 23-ի ասուլիսում հայտնեց ՀՀ Առեւտրի եւ
տնտեսական զարգացման նախարար Ներսես Երիցյանը:
«Մասնավոր հատվածի հետ սկսել ենք քննարկումներն այն մասին, թե
ինչպես կարող ենք ուղղորդել այդ ներդրումները», - նշեց նախարարը`
հավելելով, որ օտարերկրյա ներդրողները եւս ունեն ծրագրեր, որոնք
վերաբերում են Հայաստանում արդյունահանվող հանքային ռեսուրսների
վերամշակման ցիկլի խորացմանը: Նրա խոսքերով, հանքարդյունաբերության
եւ քիմիայի ճյուղերի զարգացումը նախատեսվում է խթանել դրանք մեկ
համախմբի (կլաստեր) մեջ դիտարկելով, ինչը կնպաստի ներհանրապետական
կոոպերացիայի աճին, տեխնոլոգիական փոխլրացմանը եւ հումքի
արդյունավետ օգտագործմանը: Երիցյանը նաեւ կարծիք հայտնեց, որ պետք
է անցում կատարվի խոշոր քիմիայից փոքր քիմիայի, «որպեսզի
կարողանանք առավելագույն արդյունք ապահովել, այդ թվում`
համաշխարհային շուկաներին ինտեգրման առումով»:
Նրա տեղեկացմամբ, հայկական խոշորագույն քիմիական «Նաիրիտ
Գործարան»-ի գործարանի սեփականատեր բրիտանական «Ռայնովիլ»
ընկերությունը իրականացնում է մեծ ծավալի նպատակաուղղված
ներդրումներ: «Պետք է կարողանանք ամբողջ համախումբը ձեւավորել,
որպեսզի կարողանանք դրա հումքի վրա զարգացնել քիմիական նոր
արդյունաբերություն, որը կլինի մրցունակ, տեխնոլոգիական առումով
ժամանակակից»,- ասաց Ն.Երիցյանը:
2007թ. նախորդ տարվա համեմատ հանքարդյունաբերության եւ
մետաղագործության ճյուղում թողարկվմած արտադրանքի ծավալնն աճել է
6,6%-ով, արտահանումը` 7,1 %-ով: Քիմիական արդյունաբերության
արտադրության ծավալներն աճել են 20,4%,-ով, ինչը պայմանավորված է
«Նաիրիտ գործարան» ՓԲԸ հզորությունների ավելացմամբ եւ Վանաձորի
«Պրոմեթեյ-Խիմպրոմ» ՓԲԸ վերագործարկմամբ: