ԵՐԵՎԱՆ, 11 ՄԱՅԻՍԻ, ՆՈՅՅԱՆ ՏԱՊԱՆ: 2007թ.-ի ապրիլին մարտի
համեմատ ՀՀ պարենային ապրանքների շուկայում արձանագրվել է 0,1%
գնանկում, ինչին մեծապես նպաստել է բանջարեղենի, շաքարավազի,
հացամթերքի, սուրճի, թեյի, կակաոյի 2,2-0,2% գնանկումը:
ՀՀ Ազգային վիճակագրական ծառայության տվյալներով, 2007թ.-ի
ապրիլին 2006թ.-ի ապրիլի համեմատ հանրապետությունում արձանագրվել է
բանջարեղենի եւ կարտոֆիլի 26% գնաճ: Նշված ժամանակահատվածում
հանրապետությունում գրանցվել է գազարի 3,1%, վարունգի 3,9%, լոլիկի
4,9%, գլուխ սոխի 6,6%, սխտորի 12,8%, կաղամբի 28,3%, կանաչ սոխի
42,4%, կարտոֆիլի 61,1% գնաճ:
2007թ.-ի ապրիլին մարտի համեմատ բանջարեղենի եւ կարտոֆիլի
ապրանքախմբում գրանցվել է 2,2% գնանկում: Վարունգի, լոլիկի, կանաչ
սոխի, գլուխ սոխի, Ճակնդեղի, սխտորի գները նշված ժամանակահատվածում
նվազել են 24,1-0,1%-ով: Դրան զուգընթաց, հանրապետությունում
արձանագրվել է գազարի (1,9%) կաղամբի (3,5%), կարտոֆիլի (7,7%)
գնաճ: 2007թ.-ի ապրիլին շարունակվել է շաքարավազի նախորդ երեք
ամիսներին գրանցված գնանկման միտումը եւ 4 ամիսների ընդհանուր
գնանկումը կազմել է 8,7%: Ապրիլին մարտի համեմատ
հանրապետությունում գրանցվել է շաքարավազի 1,6% գնանկում:
Հացամթերքի, կենդանական եւ բուսական յուղի, սուրճի, թեյի,
կակաոյի, ոչ ոգելից խմիչքի ապրանքախմբերում 2007թ.-ի ապրիլին մարտի
համեմատ գրանցվել է 0,4-0,1% գնանկում:
2007թ.-ի ապրիլին 2006թ.-ի դեկտեմբերի համեմատ ձկնամթերքի
ապրանքախմբում արձանագրվել է 37,5% գնաճ, այդ թվում, ապրիլին մարտի
համեմատ ձկնամթերքի գներն աճել են 8,1%-ով, ինչը մեծապես
պայմանավորվել է «սիգ» տեսակի թարմ ձկան 9,1% գնաճով: «Իշխան» եւ
ապխտած «սիգ» ձկների գները նշված ժամանակահատվածում աճել են,
համապատասխանաբար, 5,6%-ով եւ 5,1%-ով:
Մրգի ապրանքախմբում 2007թ.-ի ապրիլին 2006թ.-ի ապրիլի համեմատ
գրանցվել է 33,7%, իսկ 2007թ.-ի մարտի համեմատ` 2,2% գնաճ: Վերջինս
մեծապես պայմանավորվել է արքայանարինջի 3,4%, նռան 3,5%, տանձի
5,5%, նարինջի 7,8%, մանդարինի 16,1% գնաճով: Կիտրոնի եւ խաղողի
գները նշված ժամանակահատվածում աճել են համապատասխանաբար, 1,9%-ով
եւ 2,1%-ով:
Մսամթերքի ապրանքախմբում 2007թ.-ի ապրիլին մարտի համեմատ
գրանցվել է 0,5% գնաճ, ինչը հիմնականում պայմանավորվել է խոզի եւ
ոչխարի մսի, համապատասխանաբար, 2,5% եւ 2,2% գնաճով: Տավարի մսի
գնաճը նշված ժամանակահատվածում կազմել է 0,4%: 2007թ.-ի
հունվար-մարտին ձվի 8,7% գնանկմանը ապրիլին հաջորդել է 0,2 գնաճ:
Կաթնամթերքի ապրանքախմբում 2007թ.-ի ապրիլին մարտի համեմատ
գրանցվել է 0,2% գնաճ, իսկ հրուշակեղենի, այլ մթերքի, ոգելից
խմիչքի եւ ծխախոտի ապրանքախմբերում պահպանվել է գների նախորդ ամսվա
մակարդակը: