«SOS ԹԵՂՈՒՏ» ԲՆԱՊԱՀԱՊԱՆԱԿԱՆ ՀԱՍԱՐԱԿԱԿԱՆ
ԿԱԶՄԱԿԵՐՊՈՒԹՅՈՒՆՆԵՐԻ ԿՈԱԼԻՑԻԱՆ ԴԻՄԵԼ Է ՀՀ ՆԱԽԱԳԱՀԻՆ
01-03-2007 19:45:00 | Հայաստան | Հասարակություն
ԵՐԵՎԱՆ, 1 ՄԱՐՏԻ, ՆՈՅՅԱՆ ՏԱՊԱՆ: Բնապահպանական 26 հասարակական
կազմակերպություններ միավորող «SOS Թեղուտ» կոալիցիան Թեղուտի
հանքավայրի նախատեսվող շահագործման դեմ գրավոր բողոք է ներկայացրել
ՀՀ նախագահին: Ինչպես մարտի 1-ի ասուլիսում նշեց «SOS Թեղուտ»
կոալիցիայի անդամ «Հայաստանի անտառներ» հասարակական
կազմակերպության ներկայացուցիչ Մհեր Շառոյանը, հանքավայրի
շահագործմամբ է'լ ավելի մեծ վնաս կհասցվի շրջակա միջավայրին եւ
տեղի բնակչության առողջությանը: Ըստ նրա, ծրագրի իրականացման
դեպքում կխախտվեն մի շարք միջազգային կոնվեցիաներ, ՀՀ
Սահմանադրությունը եւ օրենքները:
Մ.Շառոյանի խոսքերով, «Արմենիան քափր փրոգրամ» (ACP)
ընկերության այդ ծրագրի պետական բնապահպանական փորձաքննության
ընթացքում ճիշտ չեն գնահատվել պետությանը, բնակչությանն ու շրջակա
միջավայրին հասցվող իրական վնասները: Ըստ նրա, ծրագրի իրականացումը
հատկապես աղետալի հետեւանքներ կարող է ունենալ տեղի ջրահավաք
ավազանի բնական հավասարակշռության պահպանման առումով` զրկելով
տարածքի բնակավայրերը խմելու ջրից:
Բացի այդ, ինչպես նշեց Թեղուտին հարակից Շնող գյուղի բնակիչ
Վառշամ Ավետյանը, ոչնչացման վտանգ է սպառնում տեղի
պատմամշակութային արժեքավոր մի շարք հուշարձանների: «Մենք
մեղադրում ենք ուրիշներին հայկական պատմական հուշարձանները
ոչնչացնելու հարցում այն դեպքում, երբ ինքներս ենք նույն կերպ
վարվում»,- ասաց նա:
Սոցիալ-էկոլոգիական ասոցիացիայի նախագահ Սրբուհի
Հարությունյանը նշեց, որ հանքավայրը շահագործելու համար կհատվեն
լեռնային բարձրարժեք անտառներ, ինչի դիմաց ACP-ն տարեկան կմուծի
ընդամենը 8 մլն դոլարի չափով հարկեր, իսկ ընկերության բաժնետերերը
կստանան 14 մլն դոլարի եկամուտ: «28 տարվա ընթացքում ստանալով,
ավելի քան 406 մլն դոլարի մաքուր շահույթ, ACP-ն այդտեղից կհեռանա`
բնակչությանը թողնելով խախտված հողեր, լեռնային աղբյուրների
ցամաքած ակունքներ: Իսկ այդ ամենը վերականգնելու համար կպահանջվեն մի
քանի սերունդների ջանքեր»,- ասաց Ս.Հարությունյանը:
Ասուլիսին մասնակցում էին նաեւ Թեղուտի համայնքապետ
Հարություն Մելիքսեթյանը, Շնողի գյուղապետ Կորյուն Շադինյանը եւ
այդ գյուղերի մի խումբ բնակիչներ: Նրանք նշեցին, որ իրենք դեմ չեն
ծրագրի իրականացմանը, քանի որ տեղի բնակիչների գրեթե կեսը
գործազուրկ է եւ «ընտանիքը կերակրելու ոչ մի միջոց չունի»: Իսկ
էկոլոգների այն ահազանգը, թե Թեղուտը 30 տարի հետո վերածվելու է
մեռյալ գոտու, նրանց այս պահին այդքան էլ չի անհանգստացնում: «Եթե
այսպես շարունակվի, վաղ թե ուշ Թեղուտը անմարդաբնակ կլինի»,- ասաց
Թեղուտի համայնքապետը: