ՀԱՅԱՍՏԱՆՈՒՄ ԹԱՓՈՒՐ ԱՇԽԱՏԱՏԵՂԵՐԸ ՇԱՏ ԴԺՎԱՐՈՒԹՅԱՄԲ ԵՆ
ԼՐԱՑՎՈՒՄ,- ՀԱՅՏԱՐԱՐՈՒՄ Է ԶԲԱՂՎԱԾՈՒԹՅԱՆ ԾԱՌԱՅՈՒԹՅԱՆ ՊԵՏԸ
16-01-2007 19:45:00 | Հայաստան | Հասարակություն
ԵՐԵՎԱՆ, 16 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանում թափուր
աշխատատեղերը կամ շատ դժվարությամբ են լրացվում, կամ էլ
ընդհանրապես չեն լրացվում: Այս մասին հունվարի 16-ի ասուլիսում
հայտնեց ՀՀ Աշխատանքի եւ սոցիալական հարցերի նախարարության
«Զբաղվածության պետական ծառայություն» գործակալության պետ Սոնա
Հարությունյանը: Ըստ նրա, դրա հիմնական պատճառն այն է, որ չկան
աշխատաշուկայում պահանջվող մասնագետներ` էլեկտրաեռակցողներ,
գազաեռակցողներ, կռունկավարներ, փականագործներ եւ այլն: Ըստ նրա,
եթե Երեւանում թափուր աշխատատեղերի մեծ մասը բանվորական
մասնագիտությունների գծով են, ապա մարզերում առկա են
մանկավարժների, բժիշկների թափուր տեղեր:
Ս.Հարությունյանը հայտնեց նաեւ, որ 2006թ.-ի նոյեմբերից
իրականացվող «Ձեռնարկատիարական գործունեության պետական գրանցման
համար գործազուրկներին եւ հաշմանդամներին ֆինանսական աջակցության
տրամադրում» ծրագրի շրջանակներում գործակալությունը
համագործակցելու է Փոքր եւ միջին բիզնեսի զարգացման հիմնադրամի
հետ: Այդ համագործակցության շնորհիվ հնարավոր կլինի համապատասխան
մասնագիտական ուսուցման ծրագրում ընդգրկված գործազուրկներին
ձեռնարկատիրական գործունեություն սկսելու համար վարկեր տալ:
Նշվեց նաեւ, որ «Մասնագիտական ուսուցում» ծրագրի
շրջանակներում 2006թ.-ին 25 մասնագիտությունների գծով ուսուցման
ծրագրերում ընդգրկվել են 1050 գործազուրկներ, որոնցից 100-ը
ուսուցումն ավարտելուց հետո անմիջապես ապահովվել են աշխատանքով:
2005թ.-ին ուսուցում անցածներից 2006թ.-ի ընթացքում աշխատանքի է
տեղավորվել նրանց շուրջ 70%-ը: