ԱԴՐԲԵՋԱՆԸ ԼՈՒՐՋ ՉԻ ԸՆԴՈՒՆՈՒՄ ԵՎՐՈՊԱԿԱՆ ՄԻՈՒԹՅԱՆ ԱՐՏԱՔԻՆ
ԿԱՊԵՐԻ ՀԱՆՁՆԱԿԱՏԱՐԻ ՀԱՅՏԱՐԱՐՈՒԹՅՈՒՆՆԵՐԸ
31-08-2006 18:41:00 | Ադրբեջան | Միջազգային
ԲԱՔՈՒ, 31 ՕԳՈՍՏՈՍԻ, ՆՈՅՅԱՆ ՏԱՊԱՆ: «Այն, որ Եվրոպական
միության ինչ-որ հանձնակատար մտահոգված է Ադրբեջանի ռազմական
ծախսերի մեծացմամբ, իր սեփական գործն է: Եթե որեւէ մեկը մտահոգված
է դրանով, ինչ արած, թող այդպես լինի»:
Այս մասին հայտարարել է Ադրբեջանի պաշտպանության նախարար,
գեներալ-գնդապետ Սաֆար Աբիեւը: Ըստ նրա, նա լուրջ չի ընդունում
Ադրբեջանի եւ Վրաստանի կողմից պաշտպանական ծախսերի մեծացման
վերաբերյալ Եվրոպական միության արտաքին կապերի հանձնակատար Բենիտա
Ֆերերո-Վալդների հայտարարությունները, եւ ավելացրել, որ ԵՄ եւ
մյուս միջազգային կազմակերպությունների դրա հետ կապված
անհանգստությունը հիմնավորված չէ. «Մենք չենք կամենում ինչ-որ
ձեւով արձագանքել այդ հարցի նկատմամբ նրանց վերաբերմունքին:
Ադրբեջանը լավ գիտի, թե ինչ է պետք իրեն»:
Պաշտպանության նախարարը նշել է նաեւ, որ Ադրբեջանը բոլոր
միջոցները կգործադրի իր հողերի ազատագրման համար եւ կբարձրացնի
բանակի համար բյուջեի հատկացումները, հաղորդում է ԱՊԱ-ն: