«ՀՈՒՅՍ ԵՎ ՕԳՆՈՒԹՅՈՒՆ» ԵՎ «ԺՈՂՈՎՐԴԱՎԱՐՈՒԹՅՈՒՆՆ ԱՅՍՕՐ» ՀԿ-ԵՐԸ
ԱՋԱԿՑՈՒԹՅՈՒՆ ԵՆ ՏՐԱՄԱԴՐԵԼ ԹՐԱՖԻԿԻՆԳԻ 87 ԶՈՀԵՐԻ
06-12-2007 19:10:00 | Հայաստան | Հասարակություն
ԵՐԵՎԱՆ, 6 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ՄԱԿ-ի հայաստանյան
գրասենյակում դեկտեմբերի 6-ին կայացավ «Հայաստանում թրաֆիկինգի
զոհերին ցուցաբերված աջակցությունը. հոկտեմբեր 2003 - մարտ 2007»
վիճակագրական գրքույկի շնորհանդեսը: Վերջինում ներկայացված են
Հայաստանում թրաֆիկինգից տուժածների հարցերով զբաղվող եւ նրանց
օգնություն տրամադրող «Հույս եւ օգնություն» եւ
«Ժողովրդավարությունն այսօր» հասարակական կազմակերպությունների
ունեցած տվյալները: Գրքույկի հրատարակման գործում նշված
կազմակերպություններին աջակցություն է ցուցաբերել ՄԱԿ-ի Զարգացման
ծրագիրը (ՄԱԶԾ):
Ըստ «Հույս եւ օգնություն» ՀԿ-ի նախագահ Ենոք Շատվորյանի,
նշված ժամանակահատվածում բժշկական, հոգեբանական եւ իրավաբանական
օգնություն է տրամադրվել թրաֆիկինգի 87 զոհերի, որոնց
մեծամասնությունը ազգությամբ հայ են: Տուժածների 85%-ը թրաֆիկինգի
զոհ է դարձել Արաբական Միացյալ Էմիրություններում, Թուրքիայում եւ
Ռուսաստանում: Նրանցից 80%-ը ենթարկվել են սեռական, 20%-ը`
աշխատանքային շահագործման: Նշվեց նաեւ, որ տուժածների
մեծամասնությունը 18-24 տարեկան են, իսկ 25%-ը` 25-ից 30 տարեկան: